坪石邨爆水管水柱沖天　2男合力關掣齊濕透　網民：辛苦晒｜有片

牛池灣發生爆水管事故。有街坊在Threads表示坪石邨紅石樓有食水管爆裂，今日（17日）「凌晨先嚟爆，00:00噴到01:20，終於完，16樓以下停食水，唔知幾時先有返」，同時上載兩段影片，紅石樓地下有大量清水猛烈向上噴射，形成高聳水柱，部分水花四散，再沿大廈外牆向下傾瀉，猶如瀑布，水勢相當猛烈，現場水花四濺，地面亦出現大量積水。

另一段影片可見，大量清水直瀉地面，不斷濺起水花，樓下一片濕漉漉，現場有2名男子站在水流附近，不排除是維修師傅和保安員，保安雙手舉起，手持物件，為師傅擋水，以便對方關上水掣，隨着水掣關上，水勢越來越弱，兩人全身濕透。

許多網民留言指「個職員同師傅全身濕晒」、「呢啲先至叫洗樓」、「辛苦晒呀」、「個保安好好，一路幫師傅遮住個頭，連自己都冇遮」。

目前尚未確定涉事水管的確實位置、爆裂原因及受影響住戶數目，亦未有確實恢復供水時間。警方表示，今日（17日）凌晨0時23分接獲數個報案，上址爆水管。