黃大仙廟解簽檔口遭爆竊失逾3千元　居士：七國咁亂呀！

今日（29日）早上7時48分，警方接報黃大仙廟外一個解簽檔遭人爆竊，捲閘鎖頭損毀，經負責人點算損失約3千元。

現場是龍翔道黃大仙廟外其中一間解簽檔。負責人岑居士在場稱，今早返回用鎖匙開閘：「點知開極開唔到，一睇之下，原來個窿破壞咗呀！裏面七國咁亂呀，錢畀佢攞晒，三千幾蚊港幣、人民幣都有幾百蚊。」他指這是數日的生意額，慶幸一百元、五百元紙幣沒有存放在檔口：「一日搵一千幾百，呢啲係碎紙，十蚊廿蚊找贖用，大紙攞走晒。」

岑居士續稱，開檔十多年，從未試過遭爆竊，但亦難以要求管理處加強保安，直言：「諗住我哋唔係咩大生意，唔使咁緊張啦！」唯有日後自己多加一個鎖。